Շատ երգեր կան իմ սրտում
ՀեղինակՎահան Տերյան
Ավելացրել է
Շատ երգեր կան իմ սրտում,
Բայց ես էլ չեմ երգելու.
Փախչում եմ լուռ ու տրտում
Չար հողմին հլու...
Համր է հիմա իմ լեզուն
Եվ խորհուրդս խոր.
Մի նոր հուր է ինձ կիզում՝
Դառն ու ահավոր.
Ու մենության մութ ծոցում
Սիրտս՝ ողջակեզ,
Սրբում եմ ես այն բոցում,
Որ անհայտ է ձեզ.
Եվ չեք տեսնի դուք բնավ
Հուրն ու մոխիրն իմ սիրո.
Լո՜ւռ և խո՜ր և սեր, և ցավ,
Եվ ցնորք, և զոհ...
Վահան Տերյան